本區搜索:
Yahoo!字典
打印

[大學升學資訊] ◤◤資訊X放榜密碼★全方位升學資訊◢◢

[隱藏]

◤◤資訊X放榜密碼★全方位升學資訊◢◢

首先,好多謝大家一直既支持,無你地既支持,我應該今日都唔會打呢篇文章。老實講每次用超過一個鐘打一個好簡單既問題,有時候都好 tired,但見到你地既 Inbox,見到你地(好似)得到啟發,解開疑難,唔知點解心底裡總會有種喜悅既感覺。再一次多謝大家一直以黎俾我點,俾我亂up24仲聽我講 Love You Guys Foever!

好,廢話少講,我地開始

今日呢篇野主要分幾 Part
1. 分析考評局數據,揭露隱藏密碼
2. 放榜注意事項
3. 升學資訊,坊間錯誤資訊,呃錢機構解密
4. Jupas 課程比較分析
5. Q&A,你地問乜,我答乜
6. (聽日)JUPAS 排位服務

如果心急,可以先Inbox問,我會打電話打翻比你,因為打字比較慢,有時候電話會比較快

如果大家清楚遊戲規矩既話,咁我地開始入正題

[ 本帖最後由 A_MEN 於 2016-7-12 07:29 PM 編輯 ]
   

TOP

我唔會好似某d補習老師咁,特別 Hide左 資訊,然後放人所共知既「事實」出黎。最大原因都係唔希望大家比「thanks」,「多謝」,「 :P 」等等洗版。希望大家可以睇資訊為主 (其實都係比我扮下野 jea....XD)

2016放榜 統計
http://www.hkeaa.edu.hk/DocLibra ... ULL_Results_CHI.pdf

2015 放榜 統計
http://www.hkeaa.edu.hk/DocLibra ... dseexamstat15_1.pdf
http://www.hkeaa.edu.hk/DocLibra ... dseexamstat15_5.pdf

2016年總共有57,127+11,001位考生,而2015就有62 199+11 932位考生
自修生人數少左大約 1000人,而日校考生則少左 5000 人

補充:雖然自修生好多,但其實好多大學生,補習老師團隊成員年年都考(尤其math),所以唔好太擔心自修生既影響。

中文,英文科比例大幅上升!
以中文科為例,初步估計多數十個5**,而英文科多接近100
但數學科,通識科比例減少
數學科減少約200個,通識科同樣減少大約150個5**

而 Level 5 以上既情況相約,語文科比過往多出1000人,而數學通識則減少1000人
對比起往年,理科強既同學可能變得弱勢,預料 理科乘大科既課程分數會減少(例如 中大工程理學,科大城大大部份課程)

***
好笑分析:今年都係有位英文5**中文U既同學仔,但仍然有約80位英文5*以上既同學失去入大學既最低資格
(希望你地Appeal成功啦

****

整體成績上面,今年只有 4 位 狀元,另外有55位5科5 **狀元。比往年大幅減少
而自修生方面,今年並無自修生取得5科5** 成為自修狀元,但仍然有2位同學取得 34分,恭喜定先

整體成績上
184位同學取得34-35分
622(621)取得 31分-33分
1425(1410)取得28-39分
2448(2404)取得25-27分
4754(4470)取得22-24分
8096(6837)取得19-21分

31分以上為805位
28分以上為2215位
25分以上為4619位
22分以上為 9433(9089)位
19分以上為 17529(15926)位

==2015 既數據==
195:34-35分
733:31-33分
1316:28-30分
2700:25-27分
4777:22-24分
7238:19-21分

總數
31分以上:928位
28分以上:2244
25分以上:4944位
22分以上:9721位
19分以上 :16959位

可以見到由25分開始人數差距開始變大,而22分以上更比以往少700人,19分以上甚至少1000人
代表左入大學分數會進一步降低(尤其高分科)

但其實呢度只代表左考5科同學仔既分數,唔少自修生可能其他科本身已經有一定成績,但佢決定重考2 3 科不如意既科入讀心儀既學科,所以呢度都唔能夠計曬落去。而自修生比例與往年差別不大,我地可以按呢個原理照比例去估算(一陣再講呢個topic)


**其他學術科小計**
理科level 5,level5**人數全面減少,文科大幅提升(尤其中英文學),商科按比例減少,其他冷門科則有不同程度既增加/減少。
(呢度唔詳細解說,但理科5以上比例減少,同樣原理,代表需要理科才可修讀既科,入學成績都會減少入學分數:P )

TOP

《放榜注意事項》
學校考生就通常 8 點半放榜,要先返學校。但其實你班老師老早就知道你地既成績。因為佢地一早派d 叔叔姨姨去拎考評局既成績單(所以你臨走個陣,記得多謝呢班姨姨啊........佢地先係辛苦個個,通常7 點已經到灣仔考評局)。你老師應該會派比你之前做曬d小統計

例如幾多個人拎5,幾多個人拎5**,邊班成績最好,邊個人係咩科拎5 or above,有無狀元,最高分係邊個之類
之後大家應該會入禮堂,唱下校歌,聽下d老師講下你地今年學校有幾大進步(一定會講點進步,差既野唔會講),然後就9衝行6 7 層樓,行你最後一次既上樓梯之旅返到你個成日唔返學既課室,跟住就按名/分數/成績 or etc既次序派成績表。

然後你老師就會突然間對你態度好好,或者對你 Moon Face

不過 whatever!個日拎完之後,考得好多數會同下d同學9up,唔肯走,考得差多數會即刻走搵老師幫,考得唔如意(即使考得OK)就即刻喊到痴線,人生百態盡現眼前

but actually,其實你可以拎完即刻走架啦....真係可以即刻走架啦 (多數10點前搞掂)
=======================================

至於自修生就好刺激!上hkeaa既官方網站,愛回家7點半睇成績。(其實通常7點有得睇,佢分批upload上網),不過我既建議就係 7 點半先睇啦,同d自修戰友一齊睇,個心定好多。
https://www.hkdse.hkeaa.edu.hk/HKEAA/faces/home;jsessionid=v6LyXGXBDB6nL0zk8BWsqsDJ1Pw7yyN7pknfKvQk5TvGbJTTQ1bS!-1515916181!-906485191?_afrLoop=813569779088000&_afrWindowMode=0&_afrWindowId=null#%40%3F_afrWindowId%3Dnull%26_afrLoop%3D813569779088000%26_afrWindowMode%3D0%26_adf.ctrl-state%3D8s4w9b6th_4

唔記得密碼既,可以依家整返個密碼先,如果記得既就等聽日7點半開香檳啦
另外,如果真係無辦法拎到密碼既,大約12點郵差叔叔送信純熟迅速咁將你既成績單會送到你屋企 ,到時先拎黎睇都得


======================================

咁至於放榜有咩真係好想同大家講呢,其實我覺得放榜只係一個感性既心理關口,唔好太緊張。我地一般人只有幾條路。

1. 入大學
2. 入外國/內地/台灣大學
3. Asso/HD
4. 重讀
5. 做野

每一條路都有佢地既優點缺點。香港讀到固然係好,但外國讀就算只係三流大學都總比香港某部份既大學畢業生優勝。Ibank入面好多 只係外國三流既大學生都會獲得聘用,剩係英文水平,外國見識已經遠勝好多香港本地既大學生,要知道香港係 Global City ,識英文好過識字啊

而且外國唔少大學會 Offer 醫科,護士,物理治療,職業治療等等既課程,比較容易入讀。醫科可以返黎考執業試,某部份專業可以唔需要重考。

如果本身 英文真係好差,其實過台灣,內地都係一條出路。(反正香港人去北大清華都係19分
順帶一提,其實唔少大學都係3年制,當年有同學讀書麻麻。3年後,佢畢業,返黎讀Master我地都仲未畢業,所以話呢,贏在起跑線啊!!(好似係):Q :Q

但當然啦,無錢點去外國?其實都可以申請獎學金既。
申請到,我成績係香港讀啦!咁你又岩 lol
所以如果無咩錢既......而又厭倦左香港可以考慮下內地/台灣升學,或者搵其他機構既學費資助。

===================================

ASSO/HD。每年有唔少同學升讀副學士/高級文憑。

呢兩個係咩黎呢?原則上佢係銜接大學既中途課程,副學士比較理論性,主要以考試寫論文為主。高級文憑比較 Pratical,如果本身背書唔太叻,但手動能力高既可以考慮下 HD
至於係咪好難升返上大學呢?就算升到係咪都係唔好既科呢?

一般黎講,副學士既升讀大學既比例都會比較高,大約1/3既同學都會上得番UGC資助既學位,而自自資學位就好多同學都上得番去
但ASSO係咪等於失敗者?我個人睇就唔覺得

我見證過DSE 10分既學生,入讀ASSO之後係最好既學生。
又見過中文炒既學生,入ASSO之後升讀到HKU Pharmacy

其實如果你本身已經厭倦左中學個種讀書方式,ASSO/HD絕對係一個新出路。
「因材施教」呢句說話既意思本來就係如此。

ASSO既讀書方式比較似大學,唔係一試定生死,會有平時既presentation,寫essay,討論,考試。
如果本身有考試恐懼症,又覺得中學讀既野唔係自己一直所希望既事情,我建議你轉投ASSO/HD!

副學士入面有唔同既科,有law,psycho,哲學,語文等等。
只要係自己有興趣既事,其實就會讀得好。

(我會再補充 各ASSO 特色 同埋自資大學既資料)
====================================

重讀有分兩種,重讀DSE,或者轉讀GCE,或者去外國讀High School,本地國際學校,當然都有本地學校重讀啦

首先講講DSE,GCE有咩分別。
GCE係英國高考,課程比DSE多,但考試比DSE淺。
我成日都會講 DSE係佢知道你識,但HKEAA要考到你唔識,然後話你差
外國人既考試目的,只係想測試你,識唔識。識就有分,唔識就無分,就是如此 :L
(以我所知,B記開左GCE 數學同 進階數學既課程,如果決定轉讀,絕對可以考慮)

有學生DSE考得唔好,最後轉讀GCE A*AA(Math, Further math, Physics) 獲得cambridge 同hku offer :P
但呢個考試好貴,剩係考試費已經需要 $10000 ($3xxx一科),而你仲要買教科書
**不過總比ASSO/HD平既**

而重考方面,你要考慮下自己係咪真係handle到個考試。
坦白說,見過好多學生,大家問題係「心態」,無必勝決心,唔知自己為咩而要讀書(唔係入大學呢d膚淺理由)
大家到 11月,12月就開始hea.......如果你決定自修 DSE 你絕對要涯過呢個難關。

事實上DSE既考試大部份都係考「SKILLS」,尤其 4 個核心科。以考試技巧為主,大部份卷更加係你知道佢個marking需要咩,你個5* / 5**唔會無

如果重考既話,建議番大家唔好覺得無得溫,或者只係做練習。
你地絕對要分析考試報告,課程,考生錯誤,分析past paper既答案同問題,好好準備呢個考試
(當然啦,你有錢補習,人地幫你做曬呢d野,就無敵既):L :L :L

自修既路,轉制既路,都好需要你地「精神上」既支援,唔係你努唔努力,而係精神健康負唔負擔到
而「努力」係配「方法」,而唔係勤力就可以 :P


另外,如果大家自修DSE既,我強烈建議大家take新科,讀番d自己鍾意既科,例如Arts,Music,日文。
本身打算讀中文既建議讀下 文學/歷史。本身打算讀媒體藝術既可以讀VA
社工可以take 社會管理健康關懷,宗教哲學可以讀宗教

如此類推
(其實d 冷門科無乜人讀,只要勤力d就會過5)

讀自己有興趣既科,點都會有興趣讀先
有學生自修 VA,考得唔錯既成績:P
================================

做野。

可能大家覺得好遙遠,我當年有位同學讀唔成書,去左酒店學廚,幾年之後已經係半島做緊廚。佢既收入,絕對好過好多大學生,而佢真正enjoy緊自己既工作,覺得有意義。

而都有唔少大學同學係做左幾年野,先返黎讀書。其實每個人條路都唔一樣,有時候出去闖下,得著比起空談,比起讀堆唔知咩既科更加可靠。


如果覺得「呢個階段」唔適合讀書既,出去闖下,你會有新既天空 :P
甚至working holiday都得!見下呢個世界,開闊你既天空

TOP

補充:
大家應該係聽日之前已經幫自己 Plan定究竟想 讀 ASSO,大學,定自修
過多既選擇,只會令自己更加亂!

如果你本身打算入唔到大學,就自修。咁你聽日就算不幸考得唔好,咩都唔好理,返屋企,訓番教,搞掂完JUPAS之後就報補習課程

如果你本身打算入唔到大學就入ASSO,就聽日放榜之後衝出去霸位(好多都係先到先得,同埋eapp屈分好多有曬offer )如果本身無報而又想讀既,可以帶N張身份證副本,成績表副本,2-3千蚊,八達通,水。自己去(可以搵屋企人,或者「夠成熟」既朋友)


如果未清楚自己想點呢,可以再問下我

其實主要都係考慮返自己 適唔適合呢個制度,自己有咩目標,主要都係呢兩件事
(當然啦,無錢就萬萬不能   )

TOP

重要聲明:小卒資訊論壇 是一個公開的學術交流及分享平台。 論壇內所有檔案及內容 都只可作學術交流之用,絕不能用商業用途。 所有會員均須對自己所發表的言論而引起的法律責任負責(包括上傳檔案或連結), 本壇並不擔保該等資料之準確性及可靠性,且概不會就因有關資料之任何不確或遺漏而引致之任何損失或 損害承擔任何責任(不論是否與侵權行為、訂立契約或其他方面有關 ) 。